பெங்களூரில் வோல்வோ குழுமத்தின் வாகன தொழில்நுட்ப ஆய்வகம்

பெங்களூரு, மார்ச் 17: வோல்வோ குழுமத்தின் சார்பில் பெங்களூரில் வாகன தொழில்நுட்ப ஆய்வகம் அமைக்கப்பட உள்ளது.

பெங்களூரு சி.வி.ராமன்நகரில் உள்ள பாகமனே தொழில்நுட்ப பூங்காவில் வியாழக்கிழமை வோல்வோ குழுமத்தின் சார்பில் பெங்களூரில் வாகன தொழில்நுட்ப ஆய்வகத்திற்கான அடிக்கல் நாட்டுவிழாவில் கலந்து கொண்ட குழுமத்தின் துணை மூத்த செயல் அதிகாரி ஜான் கௌராண்டர் பின்னர் செய்தியாளர்களுக்கு அளித்த பேட்டி: இந்தியாவில் வோல்வோ குழுமத்தின் ஆராய்ச்சி மற்றும் செயல்பாடுகள் தற்போது ஸ்வீடனுக்கு வெளியே மிகப்பெரிய வளர்ச்சித் தளமாக மாறி உள்ளது. வோல்வோ குழுமம் தொழில்துறையில் மிகவும் லட்சியமான பாதையை இலக்காகக் கொண்டுள்ளது, அதன் காரணமாக 2040 ஆம் ஆண்டுக்குள் சுற்றுச்சூழலுக்கு பாதிப்பில்லாத வாகனங்களை உற்பத்தி செய்ய முடிவு செய்துள்ளோம். 2030ஆம் ஆண்டுக்குள் மாசு ஏற்படுத்தும் வாகன உற்பத்தியை வெகுவாக குறைப்போம்.எங்களின் 50 சத வாகன உற்பத்தியை மின் வாகனங்களாக மாற்ற இலக்கு கொண்டுள்ளோம். நாங்கள் விற்பனை செய்துள்ள வாகனங்களில் மாசு வெளியேற்றுவது 40 சதமாக குறைந்துள்ளது. இந்தப் பாதையை அடைவதற்கு, ஆட்டோமேஷன், எலக்ட்ரோமொபிலிட்டி, கனெக்டிவிட்டி முழுவதும் வளர்ந்து வரும் தொழில்நுட்பங்கள் மற்றும் புதிய வணிக மாதிரிகளைப் பின்பற்றுவதற்கான உலகளாவிய நிறுவன அளவிலான வணிக மாற்றத்தின் அடிப்படையில் தொடர்ந்து செயல்பட்டு வருகிறோம். 2030-ஆம் ஆண்டுக்குள், எங்கள் வருவாயில் 50 சதம், சேவைகள் மற்றும் தீர்வுகள் மூலம் கிடைக்கும். ஸ்வீடனுக்கு வெளியே உள்ள வோல்வோ குழுமத்தின் மிகப்பெரிய ஆராய்ச்சி மற்றும் மேம்பாட்டுத் தளம் பெங்களூரில் அமைக்கப்பட உள்ளது, எங்களின் மற்ற உலகளாவிய ஆதரவு செயல்பாடுகளுடன் இங்கு அமைந்திருப்பதால், இந்த மாற்றப் பயணத்தில் இந்தியா முக்கியப் பங்காற்ற உள்ளது என்றார்.

வோல்வோ குழுமத்தின் தேசியத் தலைவர் மற்றும் மேலாண் இயக்குநர் கமல்பாலி கூறியது: இந்தியாவில் உள்ள வோல்வோ குழுமத்தில், உலகளாவிய போக்குவரத்து உலகின் எதிர்காலத்தை வடிவமைப்பதில் முக்கிய பங்கு வகிப்பதில் நாங்கள் பெருமிதம் கொள்கிறோம். எங்கள் பொறியாளர்களுக்கு மிகவும் பலனளிக்கும் மற்றும் திருப்திகரமான பணிச்சூழலை வழங்குவதே எங்கள் நோக்கம். கற்றல், திறன் மேம்பாடு, யோசனைகளை செயல்களாக மாற்றுவதற்கான அதிக சாத்தியக்கூறு, உலகளாவிய தொடர்பு, நல்ல வேலை, வாழ்க்கை சமநிலை, நெகிழ்வான பணியிடங்கள், நம்பிக்கை, வெளிப்படைத்தன்மை மற்றும் ஒத்துழைப்பு ஆகியவற்றால் இது சாத்தியமாகிறது. அதே நேரத்தில் உலகின் முன்னணி வாகனங்களை தயாரிப்பதில் மேம்பட்ட தொழில்நுட்பத்தை புகுத்தி வருகிறோம்

இந்தியாவில் வோல்வோ குருமம் சரக்குவாகன தொழில்நுட்பத்தில் 1600க்கும் அதிமான‌ பொறியாளர்களைப் பணியில் அமர்த்தியுள்ளது, இந்த எண்ணிக்கை வரும் ஆண்டுகளில் கணிசமாக அதிகரிக்கும். ஏற்கெனவே வாகன கேரேஜ்கள், எலக்ட்ரிக்கல் மற்றும் எலக்ட்ரானிக்ஸ் ஆய்வகங்கள், ஏஆர், விஆர் ஆய்வகங்கள் மற்றும் ஆதாரங்களுக்கான அணுகல் போன்ற பல வசதிகள் உள்ளன என்றார். பேட்டியின் போது வோல்வோ குழுமத்தின் சரக்கு வாகன தொழில்நுட்ப பிரிவின் துணைத் தலைவர் சிஆர் விஸ்வநாத் உடனிருந்தார்.